中國同香港呢兩隊波有個共通點，就係極少球員喺非本地聯賽搵食；中國得張呈棟，香港就有白鶴同高梵。中國球員𠵱家好難走出去，一嚟能力問題，二嚟係中超太有錢。
呢幾年，中國經濟好，連帶幾支中超勁旅都好有錢，球員人工高之餘，喺轉會窗嘅總開支拍得住四大聯賽。雖然好多中國球員都仲以旅歐為目標，但留喺中超人工咁高，唔多唔少都會消磨佢哋嘅鬥志。但相比球員本身，球會先至係球員旅歐嘅最大阻礙。中超有保護本地球員嘅政策，每隊波最多只得五個外援，原意係等多啲中國球員上陣，但最明顯結果係炒高晒中國球員嘅轉會費，國腳級嘅郁啲都上千萬人民幣身價；至於孫可就最貴，6,600萬人民幣，接近成千萬歐元。對於中超球會，佢哋有錢兼有需要，先會用咁多錢買中國球員，但對於荷甲、德甲、葡超嘅球隊呢？孫可呢個身價，幾乎夠利華古遜買到個查維亞靴南迪斯！
喺中國國腳市值虛高嘅年代，普通歐洲中小型班都買唔起，所以出現一類商業式嘅轉會，好似張稀哲同張呈棟。張呈棟今夏轉投華歷簡奴，本身唔係教練團嘅意思，而係贊助商錢寶搞嘅；呢宗轉會引起華歷簡奴內部幾大哄動，教練柏高仲公開批評贊助商介入球隊事務。對球員嚟講，呢種商業式嘅轉會聽落唔太光彩，人哋睇中你嘅唔係球技，只係你背後嘅市場，但小弟都希望張呈棟可以把握機會，等西班牙人知道中國球員係有料到
文：咖喱