老馬有火的四哥謝賢，上月中出席《4個小生去旅行》的記者會時，在眾目睽睽之下怒摑曾江，引起全城關注，雖然事後他們否認是宣傳伎倆，但此事的確令觀眾對節目的關注度大增，結果令收視成績理想，昨日更在將軍澳舉行祝捷會，可惜只有胡楓、曾江和Joe Junior三個小生出席，四哥則未有現身，似乎仍然氣難下。
修哥揸咪好盡責
對於四哥缺席活動，被誤中副車遭打甩眼鏡的修哥，似乎沒有將事件放在心上，未開始訪問，已經笑稱有問題可以問阿Ken（曾江），榮升做Senior的Joe Junior，今次亦不用再揸咪，改由修哥頂上。問到他們會否覺得四哥缺席而感遜色？修哥立即大叫監製，問老四為何缺席？監製解釋因為度不到期，修哥笑說：「其實四哥唔喺香港，唔信你哋可以打畀佢，但係我冇搵佢，都係聽人講。」
Joe Junior就指修哥是大哥哥，有甚麼都由他代為回答，自己連「咪」都交給修哥，誰不知修哥搞笑地說：「揸弗就話好啫，揸咪你叻啲。」但修哥揸咪認真盡責，其間只要Joe Junior一出聲，他便會將咪遞到對方的嘴邊。
後來，問到曾江有否與四哥聯絡，他只說：「佢冇搵過我。」修哥為免講多錯多，立即以肚餓為理由解圍，曾江忍不住大讚他醒目，修哥聞言鬼馬地說：「話我醒即是話我豬頭炳啦。」
另一方面，問到假如開續集會否預四哥？修哥又立即大叫監製並說：「佢哋問我下次仲搵唔搵老四，唔搵都冇所謂㗎！」聽到監製話查實今次四哥只是畀面修哥，修哥笑說：「我又俾人擺上枱，真係好難落台。」至於希望到哪裏拍續集，曾江笑說：「灣仔或者遠啲去西貢喇，我今次可以用電動輪椅，咪唔使其他人推。」
撰文：張悅