特首話曾有5歲細路問佢住屋問題，可能真係冇講大話。有保險公司都用7歲嘅美心妹妹楊鎧凝（Celine）賣廣告，叫人儲錢買樓。Celine一臉期盼望住浮喺天空上嘅「Dream House」，配上「我想儲錢買樓」、「敢想，未來才更精彩」，提醒你哋班樓奴，人哋剛剛開學升二年班就諗定儲錢買樓，你班廢青真係輸晒係起跑線上。
呢個咁有前瞻性嘅廣告，係港鐵站同巴士車身都見到，有網民大嘆：「細細個就開始洗腦，訓練下一批樓奴」；有人灰到話唔想出世。其實暑假時，Celine嘅寫真已經引起風波，媽媽楊太被質疑當個女係「搖錢樹」，今次楊太回應話個廣告2012年已經係電視播過，覺得再被提起好無奈喎。