區議會選舉臨近，經過上屆選舉被踢爆種票問題嚴重，包括民主黨、民建聯在內嘅各個政黨呢排都先後公佈發現懷疑個案，轉交選舉事務處跟進。不過，民建聯陳恒鑌噚日就連同幾個葵涌石蔭邨街坊開記招，話民主黨葵青區議員尹兆堅投訴佢哋嘅選民資格，近日收到選舉事務處信件要求住址證明，仲要佢哋上庭聆訊，有長者自言「驚到食唔落飯」。
尹兆堅向八方解釋，話職員係按經驗同一貫做法，將懷疑個案交畀選舉事務處跟進，重申近年種票情況嚴重，佢哋只可透過民間力量盡量改善千瘡百孔嘅選民登記制度，絕唔係陳恒鑌所講濫用機制，「咁民建聯係咪又濫用機制？根本係扣帽子」。又話如果居民因此受影響表示抱歉，願意撤回投訴，而市民如果收到選舉事務處嘅確認信，其實只需要填妥回條交回即可。