今日中共紀念抗戰勝利70周年閱兵，為咗今次「晒馬」勞民傷財，其間北京機場要關閉，天安門、王府井一帶又封晒路，保安極度森嚴，受邀出席者都限制多多。港府率領嘅觀禮團連同港區人大、政協，合共約有500人獲邀出席，花生友聽聞，其實唔少人都唔多情願去，皆因天氣熱，最慘就係全部要自己顧自己，冇助手老婆陪住，悶之餘仲諸多不便。
配偶 保鑣 冇得跟身
有人同花生友呻，今次觀禮團係以個人身份受邀請，為咗方便安檢，所以出席者嘅配偶如果不在名單之列，係唔可以隨行入住指定酒店，而一向出入有大堆保鑣、助手嘅大孖沙、富豪等，都要一視同仁，隨從助理通通冇得跟出跟入，出席活動由大會安排車輛接送。
唔好忘記班政商界名人、政協，好多上咗年紀，平日出入都要助手、太太、仔女扶住跟出跟入，𠵱家得一條友自己顧自己，話就話隨行有國家照顧，但係好似嘉華國際主席呂志和咁，老人家已經年過80，仲要佢哋曬住行行企企成6、7粒鐘，都咪話唔辛苦，不過為咗畀面中央無計，好多人只好頂硬上！難怪唔少人自己做足準備，女士就帶定太陽油、太陽眼鏡，做足防曬，要企咁耐，一對舒服嘅平底鞋自然唔少得，好似工聯會立法會議員黃國健就特登買對氣墊波鞋㖭。
花生友
周二、四刊出