35歲的胡杏兒，今年真正玩轉腦朋友，阿樂、阿愁輪住上場。離開工作16年的娘家TVB，絲絲不捨，其間穿插笑住拍拖、趕住開店的日子，以往1：99的工作比重，誓要重新調整。「我成日同自己講，人只會活一次，我35歲，真係只有365日係35歲，之後我就36歲、37歲，我想盡量live my life，不枉此生。」人生的另一本《Secret Garden》 ，她已買定顏料，準備好上色。
採訪：林妙萍
攝影：周樂恒
化妝：Cyrus Lee、Miko Wong
髮型：Lorrine Lam of Hair Culture
瘦了一個圈的胡杏兒，早前帶了自己婚紗店的晚裝，到《蘋果》影樓受訪。內地工作、籌備婚紗店開幕、盛傳婚訊，約滿TVB更忙，「以前99%工作，𠵱家想慢慢減啲，平衡啲，不過似乎都唔得，好似越來越忙！」
愛男友唔離地
最忙的其中一部份，當然是拍拖。杏兒和圈外男友李乘德（Phil）拍拖不足一年，已盛傳12月28日在英國行禮。兩人未去到瘋狂放閃的地步，但至少大大方方，問到喜歡男友哪方面，「鍾意嘅嘢，都好多㗎喎，哈哈哈！」甜到漏，笑完再講，「佢係一個唔離地、好貼地嘅人，你知啦，做artist有時會同個世界隔絕，佢呢，係覺得同朋友、屋企人，甚至陌生人之間嘅交流同愛係好重要，對人生好有passion，同佢一齊之後，真係改變咗我好多。」男友在外國長大，但有客家人的傳統，間中會帶她去祠堂拜神，兩個人又會一齊去睇波，「人生觀、價值觀各方面要有，外國文化又有，中國文化又有，所以我哋好夾。」
最怕變黃面婆
至於盛傳的年底結婚，杏兒依然笑住否認，「唔好傳來傳去啦，出自我把口先係真啦，去外國搞，好勞師動眾喎。」合理推論，婚後應火速造人生仔，有指高齡產婦年齡已由昔日的35歲，下調到32歲，「細路仔，真係唔知，冇諗過幾時生、邊個教，有少少遙遠，到時先知。」婚後不怕煮飯、不怕生仔、只怕變黃面婆，「煲飯、煲湯炒餸呢啲好簡單。如果做咗人太太，最搞唔掂應該係怕自己keep得唔夠靚，又要入得廚房又要出廳堂，始終我做呢行，唔可以畀自己太差。」
Yes Dress
藝人做生意，離不開飲食業、經理人公司，胡杏兒今年就孖住設計師朋友Kev Yiu開婚紗禮服店Kevolie，「幾年前拍《奪命金》，杜Sir（杜琪峯）帶我去威尼斯影展，嘩，要行國際紅地毯，點算呢？偶然間識咗Kev，佢好開心又用心，一個人一針一針咁幫我釘咗件好靚晚裝，之後做咗朋友，覺得佢好有passion，唔係一個生意人。」幾年下來，儲了星級客徐子淇、吳雨霏、薛凱琪、方大同等，杏兒與Kev齊膽粗粗，一腔熱血開店做老闆，「我好鍾意睇一套外國真人騷節目《Say Yes to the Dress》，真係㗎，人生點都靚一次，好多女仔覺得搵到件啱嘅婚紗同搵到啱嘅老公係差唔多重要。」至於杏兒的Yes dress就諗好要長袖、簡約經典款。
娘家16年
十年人事幾番新，何況近年翻天覆地的電視風雲。TVB近年爆小生花旦逃亡潮，好似陳法拉，胡杏兒今年也離開娘家，不再續約，「TVB可以話係我第一份工，做咗16年，係我成長嘅地方，好有感情啦，我𠵱家都仲喺度適應緊。」
歷年由做人妹妹的《流金歲月》，到《野蠻奶奶》古裝時裝孖住上，增肥到152磅的《肥田囍事》，曾被狠批的演技，以至近年叫好叫座的《衝上雲霄II》，有喜有悲，「我覺得自己好幸運，有一段咁難忘嘅日子。」日日出入化妝間、熱天冷天入廠，點滴片段最不捨。
「簽約嗰幕」
2011年封三料視后難忘，1999年簽約TVB的第一天，更如同影像定格，「記得簽約嗰一幕，因為當時藝員部好細，嗰時好似唔夠20個artists，嗰度有一道牆，貼晒佢哋啲相上去，都係大大張A4，有古天樂、撈家（羅嘉良）、宣萱、陳慧珊，呢啲哥哥姐姐喺度，我諗自己有冇一日好似佢哋咁呢？」杏兒的相，後來當然也在這面明星牆上，「好細張，幫我簽約嗰位前輩，𠵱家都唔喺TVB。」之後打開了她在電視圈的大門，今年她自己再打開這道門、走出去，「希望人生多番啲嘢，等自己見多啲，好想盡量live my life !」
更多精采時尚內容，盡在 http://add.appledaily.com 。