一向辯才出色嘅立法會主席曾鈺成，噚日出席一個專講藝術創意的論壇時罕有「露底」，俾學生問到口啞啞。話說有學生質疑曾主席身為香港最高立法機構嘅主席，點會連年輕人藝術訴求都毫不了解？曾主席聞言不得不承認，自己唔只對藝術教育唔了解，其實對好多其他嘢都唔了解，因為佢係議員唔係教授，又話自己以前做老師，要學生嚴守校規；𠵱家做立法會主席，又要議員遵守議事規則，工作都係壓制創意，大會噚日搵佢去講創意真係有啲諷刺。
講藝術令學生「O嘴」
事實上，曾主席噚日唔少有關藝術的言論，都令台下學生「O嘴」。包括喺學生投訴香港藝術學院不足，曾主席話已經好好，因為過去連演藝學院都冇！有教師質疑西九拖咗好耐仍未起好時，曾主席竟然話香港好多路都無封，需要可以喺街頭表演！八方現場見到，唔少學生聽到主席咁答都鬧「有冇搞錯？」「係咪撩交打？」似乎真係覺得呢啲答案唔多掂。