曾飾演「哪吒」一角嘅前藝員西貢區區議員方國珊，俾警方落案控告佢襲擊民建聯立法會議員葛珮帆，案件噚日首度提堂，佢契爺胡楓亦有到庭力撐寶貝契女。修哥近日套《四個小生去旅行》戲內戲外同樣精采，深夜又重播緊佢飾演正義大狀嘅《誓不低頭》，人氣急升，好多出庭市民一見到佢，紛紛攞出手機拍修哥，完全忘記咗大家正身處法院範圍，結果要勞煩保安員逐個提醒「唔可以影相」。
方國珊否認打葛珮帆
方國珊事先張揚契爺胡楓會出庭支持佢，果然噚日朝早9點鐘就見佢同修哥現身法庭。雖然落住大雨，但係方國珊擔住遮帶住修哥慢慢行入法院大樓，從容不迫，記者亦可以影清影楚。修哥猶如是日主角，方國珊俾契爺搶晒風頭，平時嘅牙尖嘴利唔見晒。記者問修哥係咪第一次嚟法庭，佢笑住話：「咁大個仔，嚟過好多次啦！」
方國珊被控普通襲擊罪，指佢舊年7月3日喺將軍澳樓盤峻瀅示威時打民建聯立法會議員葛珮帆。方國珊庭上表明唔認罪，控方話會傳召7個證人，仲會將現場片段呈堂，押後至下月14日預審。
裁判官提醒方國珊唔好接觸控方證人，如果唔係會取消擔保，還柙佢咁話，方國珊就答：「我唔會嘅。」方國珊庭外話自己冤枉，不過案件進入咗司法程序，不便詳談；佢又話嚟緊區議會開會有機會遇到葛珮帆，無可避免會講公事，但就絕對唔會談及本案。
李八方
mailto:[email protected]
