中國女網球手喺過去幾年嘅大賽偶有佳作，贏過兩次大滿貫嘅李娜自然係表表者，不過到咗今年，中國金花聲勢就弱咗少少，得兩位球手可以喺美網正賽角逐。鄭賽賽喺首圈出局之後，好在另一位金花王薔爭氣，喺周二直落兩盤擊敗希臘嘅薩卡莉，連續兩年躋身美網女單次圈。
23歲嘅王薔目前世界排名112，可唔可以成為另一個李娜仲言之尚早，不過當地記者似乎對佢都好有興趣，賽後問佢父母因乜同佢起呢個名，王薔嘅回應都好俏皮，讚記者問得好之後，就話佢都要返去問吓父母先知點解。被問到感情事，王薔就話現階段冇男朋友喎：「𠵱家要識男朋友有啲困難，因為可以相處嘅時間太少，都唔會有人肯跟住我四圍去打波喇。」
李娜參演中國真人show
至於已經退咗休嘅李娜，喺今年生咗小朋友做媽媽之後，據佢經理人爆料話好快會有新搞作，將會喺出年參加一個中國真人show節目，主題係乜仲未知，不過肯定嘅係收入唔少囉。