捲入涉貪案嘅前特首曾蔭權，之前有報道話佢唔會去北京睇閱兵，煲呔即時出聲明話會去，而且唔只佢有份，連曾太曾鮑笑薇都係觀禮團名單入面，而煲呔兩公婆噚日仲好風騷咁上京，受傳媒重視程度更超過特首梁振英，有記者追問驚唔驚會被「落鑊」，曾太仲罕有地開金口代夫回應！
話說煲呔兩公婆到達北京酒店前，大班記者一早喺度守候佢，人數仲多過等梁振英！佢兩公婆一入酒店就好風騷咁笑，呢個時候有記者追問佢，驚唔驚會被「落鑊」，煲呔曾笑而不語，不過佢旁邊嘅曾太就話「你哋擔心啫」，之後同老公笑住入升降機。
首次正式回應
曾太呢句「你哋擔心啫」，真係可圈可點，究竟煲呔夫婦覺得冇需要擔心，定係擔心唔嚟呢？有政界人士都話，呢次由曾鮑笑薇代煲呔曾回應「好有意思」，咁又係嘅，事關佢兩公婆從未正式回應涉貪案，但好多報道一直話佢就快「落鑊」，但講咗大大話話兩年，都未見行動，有建制中人分析，煲呔話晒係前特首，使唔使「落鑊」中央一定清楚，今次閱兵係國家主席習近平頭等大事，若煲呔就快「落鑊」，「北京一定唔畀佢去，或者叫佢自己話唔去，𠵱家畀得佢帶埋老婆睇閱兵，你話有冇事？」