恒生銀行（011）「一姐」李慧敏（Rose）平時現身，多數着上黑色套裝配白襯衫，噚日佢出席公益金便服日活動，就換上一件由潮人林海峰設計嘅潮tee，咁都唔止，佢喺件潮tee入面，再加一件彩色長袖衫做配襯，相當有心思。
今年公益金便服日將於10月8日舉行，林海峰設計嘅潮tee率先亮相，恒生作為活動贊助機構，Rose姐當然要幫手做模特兒喇。
佢都別出心裁，喺潮tee裏面着上一件直間彩色長袖衫，平凡中見不平凡。諗番轉頭，Rose姐平日雖然簡單着件套裝，但通常都會襯番一兩件名貴飾物，好似耳環、扣針之類，佢應該鍾意配襯嘅。
佢又貫徹低調作風，早前佢以3.75億元買入太地（1972）豪宅傲璇OPUS，之後又同老公袁天凡以15億元賣白加道22號大屋，噚日佢喺活動完結後就快閃，大家問都問唔到。