賭王何鴻燊嘅二房長女何超瓊，啱啱同邱達昌等人宣佈申請免費電視節目牌照開電視台，前日又傳嚟好消息！超瓊獲意大利總統頒授勳章「Grande Ufficiale dell’Ordine della Stella d’Italia」，由意大利駐港總領事Antonello De Riu先生向超瓊授予勳章，好友劉嘉玲唔單止一身珠光寶氣出席，仲喺微博轉發呢個喜訊。
俞琤單拖走
之後超瓊班好友喺中環嘅中國會同佢搞咗個party兼同佢補祝53歲生日，喺前晚10點鐘左右，劉嘉玲離開嗰陣畀大家問佢係咪同超瓊慶祝生日，佢笑笑口冇答到，只係臨閂車門笑笑口同大家揮手拜拜，冇耐其他朋友同埋妹妹超鳳陸續離開。話晒呢個係開心時刻，又點可以少得密友俞琤，不過佢哋冇結伴離開，俞琤單拖走人，問佢係咪同超瓊補祝生日，佢微笑點頭，最後超瓊同閨蜜榮文蔚孖住走，聽到大家同佢講生日快樂，心情勁靚嘅超瓊即刻話：「多謝晒！」再問佢有乜嘢生日願望，佢笑笑口話：「身體健康同大家開心。」
撰文：馮仁昭