宏利（945）亞洲總裁高瑞宏（Roy）40幾歲已經事業有成，仲係行內出名嘅三項鐵人。佢噚日主持推廣活動時，就請埋30歲嘅「歌壇大文豪」周柏豪，兩位即席鬥跑太空樓梯機，睇吓1分鐘，邊個行得多，結果大文豪贏咗3步咁多。
話說比賽開始時，大文豪手腳並用，chok部太空樓梯機，好似好唔想輸咁，Roy都有出力比賽，但係滋油淡定好多，明顯係本身有玩開呢部機。雖然結果係Roy以185步，對大文豪188步，輸咗3步，但係現場睇，似係佢讓賽居多。
宏利舉行呢次活動，主要係推廣「MOVE」計劃，佢哋會推出一個計步數嘅app。Roy話，將來如果會員每日行5,000至1萬步，嚟緊嗰年嘅保單會有5%至10%折扣。