長實地產（1113）樓神趙國雄形象百變，不時語出驚人。噚日佢出席旗下元朗新盤「世宙」（Yuccie Square）命名儀式，Yuccie意指年輕嘅城市創意人。為迎合呢個樓盤，年屆65歲嘅佢就扮後生，專登戴副木框眼鏡，想畀人一種潮嘅感覺喎。
佢解釋，上世紀70年代講嬉皮士，80年代講優皮士，今時今日就講「Yuccie」，即係young urban creative咁解喎！講到副眼鏡，佢話係無縫木製眼鏡，特色係摺唔埋㗎，跟住佢爆多句話：「做人都唔好摺埋！」順便提醒後生仔，唔好收埋自己。
樓盤中文名「世宙」就畀網民攞嚟講，話樓盤「細（世）就要屈就（宙）」，不過樓盤兩房最細面積都有420方呎，比起傳統上車盤沙田第一城部份實用不足300呎兩房還要大，細唔細，見仁見智。