今年係抗戰勝利70周年，內地以主旋律抗日電影《百團大戰》歌功頌德，電影喺上星期五（28日）上映，票房單日收4,530萬元人民幣成為當日冠軍，三日埋單已經過億。同期上嘅《三城記》、《烈日灼心》同《刺客聶隱娘》聲稱俾人偷票房，偷票房即係買咗睇A片，張飛就打B片，然後用筆改番A片，門票收入就歸B片，明未？
片主齊聲討
《三》片投資者王中磊好勞氣，佢日前喺微博話：「票房去哪了？請拿開髒手……所有的電影上座率都很低，但只有一部電影獨領風騷。」連帶《烈》片片主于冬亦喺微博表示自己從來沒偷人票房，希望人哋亦唔好偷佢嘅。有內地網民話，主旋律電影為咗喺後日閱兵前跑數完成任務，出到利誘，就係閱兵前入數嘅票房，一律唔使分賬淨袋，難怪會有偷票房事件再現。
此外，安樂投資嘅電影《捉妖記》差少少就超越《狂野時速7》成為歷來內地最賣座電影。近日《捉》片出現排片少票房高嘅怪現象，有啲場次只有半個鐘。安樂解釋係回饋大眾，包場招呼老人家喎。
撰文：馮仁昭