雖然話𠵱家各大品牌都想盡辦法利用網絡做推廣，廣告橋段越來越新穎，但偶然一個感覺老土或者懷舊嘅報紙廣告，都可以吸引人望多兩眼㗎。
華華噚日就喺一份財經報章，發現有間證券行賣呢個「撐老散」全版廣告，見佢老土成咁，中間又畫咗個有事業線嘅靚女，反而認真細讀。旁邊一句「市無百日虛」認真應景，近日中港股市跌到七個一皮，身邊嘅專業散戶都話冇晒心機炒股，走去打麻雀好過，可見個市幾咁虛。
證券行當然認為股市唔會虛咁耐喇，於是為散戶提供優惠，希望佢哋繼續炒股，喺指定期間開戶並做買賣，就有禮物收，吸引與否，見仁見智，華華就寧願走去打麻雀嘞。升市始終要有資金與投資者信心配合，𠵱家兩者都唔多配合，無謂交學費喇。