俄羅斯靚女球手舒拉寶娃自從喺溫布頓女單四強輸畀宿敵細威後，就一直冇比賽，而期間佢更同保加利亞球手男友狄美托夫分手，諗住回復單身嘅舒娃可以趁美國公開賽而重振聲威，點知佢日前又話因為腿傷，要退出今屆美網。因傷退賽已夠慘，更慘嘅係舒娃仲俾前男友禾積斯「潤」，話永冇可能同佢復合！
舒娃喺七月嘅溫網四強俾細威淘汰出局後，加上同狄美托夫分手，都唔知因為心傷定身傷，舒娃之後一直以腿傷為理由，退出咗多倫多及辛辛那堤等賽事；而喺上周六嘅美國賽前記者會，舒娃就話會努力為美網準備就緒。點知言猶在耳，舒娃周日就喺個人fb度話：「我已經盡咗努力，可惜都趕唔切喺美網展開前有足夠比賽狀態。」被列為賽事三號種籽嘅舒娃退賽，令佢首圈對手澳洲嘅嘉莉維露娃自動晉身次圈。
禾積斯拒絕復合
另一邊廂，舒娃嘅前未婚夫禾積斯就重返NBA，加盟紐約人。當被問題有冇可能同舒娃愛火重燃時，禾積斯就決絕咁話：「絕對冇可能！」舒娃假假哋都係睇得兼打得嘅靚女球手，吸金力又強，咁樣俾禾積斯「潤」，認真唔抵。
講番美網，周二首圈重頭戲碼，就要數準爸爸梅禮鬥澳洲壞孩子基傑奧斯嘅男單賽事，梅禮仲話佢並唔係咁壞，叫大家畀次機會佢喎！（now676台今日9:00am直播）
