恒大（3333）近年業績會越嚟越墟冚，次次都吸引大批內地傳媒採訪主席許家印，噚日一班攝影記者霸佔咗最有利位置，企喺觀眾席第一排開腳架、舉大機，搞到許家印「若隱若現」，就令大家有少少失望。
一般嚟講，傳媒喺業績會最期待嘅，就係答問環節，噚日都唔例外，好多行家都踴躍舉手。不過，因為呢批身形魁梧嘅攝記哥哥，遮住咗司儀嘅視線，搞到好多傳媒都要食白果，問唔到問題。
有「許老闆」之稱嘅許家印出名豪爽，涉足業務又多，遍佈房地產、娛樂、足球等等，係唔少內地記者嘅偶像。而且佢朋友多，城中唔少富豪都同佢份屬友好，人緣咁好，唔怪得一班傳媒朋友噚日咁失望喇。希望公關下次可以安排得好啲啦。