星級分析員陸東今年初因父母離世，無心戀戰，所以摺埋旗下基金，佢早前表明，需要1至2年時間處理家事，暫時都唔打算搞基金，不過佢都唔係完全收埋自己，唔少上市公司搵佢做獨董，佢都有幫手，新近中信資源（1205）就委任佢做獨董，今日生效。
連埋中信資源，陸東𠵱家做緊5間上市公司嘅獨董，其他公司包括嘉瑞國際（822）、鴻福堂（1446）、民生珠寶（1466），仲有佢曾經做埋產品代言人嘅TCL通訊科技（2618）。
以袍金計，中信資源算係最大手筆，畀陸東每年30萬元袍金，翻閱另外4間上市公司嘅最新年報，每年袍金介乎11萬至20萬元，夾埋5間公司嘅袍金，陸東每年應該袋到大約93萬元，除開每個月都有7至8萬元，咁又咁講，陸東投資有道，當然唔志在呢筆袍金喇。