嚟緊2017年特首大戰轉入直路，越嚟越多人包括老左吳康民同立法會主席曾鈺成等點名讚財政司司長曾俊華係唔錯嘅選擇，加上近期南下嘅內地中間人都探問獲國家主席習近平金手一握嘅鬍鬚曾有冇作戰之意、係唔係特首梁振英嘅對手，令鬍鬚曾兩年後打擂台嘅呼聲高唱入雲。而喺同CY激戰前夕，鬍鬚曾特別捧本地拳手曹星如場，唔通藉此表心迹？
fb直擊賽事貼合照
有神奇小子之稱嘅曹星如（Rex）喺啱啱過去嘅星期六，喺會展主場技術性擊倒澳洲拳手畢荷伊，獲世界拳擊理事會超蠅量級亞洲冠軍，創造佢職業拳手生涯嘅18連勝。香港市民捧場者眾，星迷原來仲包括鬍鬚曾，佢邊睇拳賽邊喺自己facebook上載Rex嘅作戰相，一開波就留言「Wonder kid! Go!」，直擊緊湊賽事。當Rex再為自己創造歷史，鬍鬚曾仲上前握手恭賀，其後上載相片大讚「Congratulations! Well done!」
八方聽聞鬍鬚曾一直都好like睇拳賽，之前喺電視機前睇過Rex作戰，對神奇小子讚不絕口，而佢同Rex嘅經理人一直有聯絡，今次難得有時間決定捧場，據聞鬍鬚曾全程為Rex打氣。唔知他日輪到佢上擂台，會唔會好似呢位港產拳王咁K.O.梁振英獲市民讚well done呢？
李八方
mailto:[email protected]