莫傑強師傅曾經喺新加坡工作廿年，多次去到新加坡總理府主理國宴。佢形容，已故總理李光耀相當平易近人，唔會諸多要求，最着重材料新鮮。由於國宴嘅賓客來自不同國家，部份賓客可能唔食牛或豬，所以佢多數選擇海鮮做材料。
令佢最難忘，就係李光耀曾經大讚佢煮嘅「麥片乳龍蝦球」，佢離開新加坡回港工作，亦將呢道菜帶到香宮（每位208元）。至於李光耀兒子、現任總理李顯龍，莫師傅形容佢「食嘢快」，好多時「其他政要開始食，佢已經食完」。
成功非僥倖，莫師傅可以獲邀主理國宴，除咗因為佢廚藝了得，另一個原因肯定係佢夠勤力。佢𠵱家堅持，每個月都要度出2至3道新菜式，不論係點心、甜品、主菜都好，最好係每星期都有一款新菜式，唔會單靠食老本。