環球股市大跌後出現前所未有恐慌情緒，霎時間負面消息太多，資金可追逐股票太少，股市貪婪擊潰市場信心。國基會前首席經濟學家Raghuram G. Rajan四年前撰寫嘅《金融斷層線──無形裂縫如何威脅全球經濟》，佢用地理學斷層線（fault line）比喻金融危機源頭。斷層線係地球表層裂縫，當地殼板塊喺斷層線上碰撞，累積壓力下產生地震。正如近日恐慌情緒取代貪婪成為主導大市力量一樣，萬念俱灰嘅念力將股市推冧。作為長線投資者，股市大跌下人沽你又沽先係最愁，可能錯過低位買入嘅時機。
市場普遍預期後市重要指標係聯儲局幾時加息同中國經濟表現。儲局9月議息臨近，所以儲局副主席費希爾喺Jackson Hole提到毋須等待美國通脹回升到2%先加息，加息路徑同力度較首次加息時間更重要。聽落冇乜大驚喜，但對通脹回升預期未變，年內加息機會仍在。利率期貨顯示，交易員估計9月加息機會，由接近55%回落到30%；12月加息機會有四成。費Sir有講中國經濟同人民幣貶值問題，但都只係蜻蜓點水式。美國面臨4,500億美元赤字，儲局資債負債表規模縮減2,500億美元同準備加息下，回籠資金究竟係註銷抑或再買美債，美國QE最終係咪要「卡冚卡」式埋單？
C+B
本欄逢周一刊出