開鑼日(9月6日)報名馬名單雖然明日(8月31日)先公佈，不過心急嘅馬迷一樣可以做定功課。今日就同大家回顧番近五季開鑼各項班次路程之賽果，一齊Mark低有咩特色，肯定對揀馬會有幫助。
自從回歸之後，特首盃成為每季開鑼的重頭戲，一直都係由頂班馬跑1200米，今年亦唔例外。講到呢個盃賽成績最好練馬師，告達理認第二，冇人敢認第一，佢先後四次捧盃，而近三匹列陣此項賽事之告廐馬「時尚風采」及「愛跑得」（兩次），更取得兩冠一亞全入Q。練者早前向記者透露，將安排「你知我心」出戰特首盃，此駒雖然以谷草較佳，不過田草1200米曾壓倒「追風駿足」贏馬，並無不合之理。最近已由新騎師史卓豐過檔操練，唔講大家可能唔記得，騎者父親史科菲當年在港首日上陣即策告廐「有本錢」捧走特首盃開齋，若然「你知我心」用史卓豐捧走此盃必成佳話。
方廐暫定有「天久」、「控制者」及「豪逸」三駒報名，大軍壓境似乎志在必得，其中前駒乃2010年此盃盟主，今次重返三戰獲兩冠一亞未失Q之一班賽上陣，有力重奪特首盃。最後一提，從來未有馬匹能夠成功蟬聯特首盃，故此上屆盟主「金滿載」若報跑亦不宜過份重視。