近年有唔少騙案假銀行之名，以電話推銷低息貸款，最終「借錢變呃錢」。詐騙行為，關乎公眾利益與投資者教育，金管局自然不敢怠慢。副總裁阮國恒（Arthur），今日下晝就會率領約廿間銀行高層，晒冷亮相，齊撐撲滅電話詐騙罪行。
聽聞站台賓架，唔係副總裁級別就係銀行第2、3把手，陣容鼎盛，畀足面監管當局。
身兼銀公署理主席嘅滙豐亞太區顧問梁兆基，當然會夥同Arthur露面，一齊公佈強化措施。另外兩間發鈔行—中銀香港同渣打（香港），聽講會分別由中銀副總裁（個人金融）龔楊恩慈，同渣打行政總裁辦公室主管譚何錦文作代表，東亞銀行（023）就由大公子、該行副行政總裁李民橋壓陣。
呢個眾星拱月場面喺前年10月底試過一次。當年金管局為咗推動保障銀行消費者權益，取消不動戶收費，22間港銀巨頭，聯袂該局總裁陳德霖站台，啟動《公平待客約章》。