公安部副部長孟慶豐而家被稱為股市救火隊長，佢一出手，A股就絕地反彈。上一輪公安部係打壓惡意做空勢力，今次就對付自己人。原來救市國家隊中，有咁多無間道！
今次被打壓重災區，為救市帶頭大哥的中信證券（6030），總共有八位高層被拉，其中三位係公司最高決策層執委會的成員，其他為負責投資、仲介業務的高層，另一位則為董事長王東明的秘書，高層幾乎一鑊熟。
另外，阿爺之前查出，全球最大對沖基金之一Cidatal旗下子公司，在A股有異常交易，將其股票戶口查封，成為境外惡意做空勢力最大嫌疑犯。中信證券之前有同呢間公司合作，雖然話已經終止合作關係，但已令內地股民譁然。
中信證券為內地最大券商，董事長王東明為前外交部副部長之子，副董事長劉樂飛則為政治局常委劉雲山之子。中共元老王震之子王軍，曾擔任大股東中信集團董事長，整個中信系太子黨雲集，極為猛料。連國家隊證金公司的股票戶口，都要全部開在中信證券，如果出事，就認真大鑊了。
黃尹華