二胡呢種中國傳統樂器，聽落好似有少少老土，但其實都可以演奏得好新潮。
中文大學研究院音樂文學碩士陳璧沁，6歲起喺音樂事務統籌處（即係𠵱家嘅音樂事務處）學二胡，佢話中樂其實可以同唔同形式嘅歌曲融合，佢就計劃喺10月舉行結合a cappella（無伴奏合唱）同二胡嘅演出。呢位靚女胡琴師接受政府新聞網訪問時強調，二胡唔只同節奏緩慢同哀傷嘅曲目相配，「可以模仿動物嘅聲音，亦可以模仿人聲」。
其實康文署喺2009年起舉辦「音樂顯才華」系列音樂會，邀請本地音樂家演出，署方會負責經費開支同統籌工作，演奏家獲發演出費，陳璧沁話多得康文署協助籌辦，佢先可以專注演出。