百利保（617）執行董事范統以58歲之齡，前日再上擂台打泰拳，佢賽前放風話自己唔係大家想像中咁好打，又話希望唔好輸、捱到全部3圈（每圈2分鐘）云云，結果佢竟然打贏年僅20歲嘅對手，仲要係打得幾狠嗰種呀。
香港拳王杜恆霖旗下武術健身中心上周六舉行慈善賽，共有20人上擂台，范統跟杜恆霖學泰拳，自然應邀參賽，成為全場年紀最大嘅參賽者。
大會原先安排一名30幾歲嘅基金經理做范統對手，點知對方喺比賽前一日話受傷，未能出賽，大會臨時拉夫，搵來一名20歲嘅跌打館學徒同佢打。
對方勝在年輕，氣力與體力均勝一籌，范統賽前好似都有些少擔心，但一落場，范統絕不膽怯，拳腳並用，下下狠勁，即使被對手掃跌，都可以即刻彈番起身，睇佢動作身手，真係唔似年近花甲。不過范統打完3圈，滿頭大汗就真嘅，睇嚟呢6分鐘賽事都唔係講笑。佢賽後好謙咁話，自己都係氣力唔夠！