幾個音樂人合資開嘅Backstage Live Restaurant，因為業主加租三成，經營困難，餐廳噚日關門大吉。前晚Backstage最後一場live show，收益捐「樂兒計劃成長基金」，除咗有學生band外，仲有老闆之一兼唱作歌手馮穎琪、黃美棋、漢洋、譚嘉荃、林建名大女林煒珊一家3口同梁珮瑚姊弟。除咗林煒珊老公有上台唱歌，梁佩瑚細佬焯皓亦有同學生一齊jam歌。
天團幫手接濟
馮穎琪上台唱咗首《放不低》，夠晒應景，不過佢話：「經營咗8年，人生有幾多個8年，大部份都係好開心嘅回憶。」聽講話有隊台灣天團出過手幫忙，會唔會係五月天呢？馮穎琪話唔可以講係邊個，但佢話：「係有天團幫咗手，當時籌款目標係5萬，所以其實個數字唔係好大。」
現場有贊助點唱，黃美棋唱兩首籌到5萬蚊，佢話：「好開心見到一間餐廳可以推動音樂，可惜因為租貴，𠵱家香港乜都貴，租貴樓貴，小店、老字號執，我覺得好浪費，好無奈香港政府又未必好正面幫到小股東、小市民。我哋可以做到啲乜呢？政府就走咗去起屋、起樓。」
撰文：馮仁昭
