鄭家純（純官）旗下新創建（659）早前宣佈，請咗機管局前行政總裁許漢忠做副行政總裁，同時又話做咗12年執董嘅林煒瀚因為要專注其他事務，明年1月1日開始調任非執董。原來林煒瀚將會過去純官妹夫杜惠愷創辦嘅「豐盛創建控股」做行政總裁（CEO）。
豐盛創建嘅業務範圍都幾廣泛，包括物業管理、洗衣、建材貿易、機電工程，創辦主席就係杜惠愷，佢阿仔杜家駒係副行政總裁，𠵱家行政總裁黃國堅都係由新創建過檔。今年10月，黃國堅就會升做副主席，林煒瀚明年1月過去就做CEO。
根據網頁資料，豐盛創建嘅寫字樓喺九龍灣其士商業中心16樓，咁啱上星期新世界發展（017）就將呢幢大廈8樓賣咗畀「豐盛創建管理」，杜惠愷持有呢間公司多數控股權，純官都有18%。大家族嘅生意關係真係千絲萬縷。