11年港姐朱晨麗早前被爆跟李逸朗（Don）返公屋過夜，朱晨麗事後急急否認，形容對方只係「閨蜜」。
好多人話李逸朗係越級挑戰，皆因朱晨麗最近越嚟越富貴，周身名牌、坐頭等歐遊、出入又有司機接送，仲啱啱買咗將軍澳豪宅，搵男友眼光自然要睇高一線。
不過又有報道指朱晨麗最近搭上38歲嘅「綠葉之星」張智軒，指男方做完活動宣傳後，以近百萬波子接載朱晨麗返香閨。有傳男方已經有個拍拖多年圈外女友，及係寵物店太子爺；但據了解張智軒已經喺08年結咗婚，仲有一個小朋友，架車同寵物店都係老婆名下，圈中好多人都知道。
記者昨日打畀張智軒，佢都好無奈咁話﹕「冇辨法，咁嗰日做完嘢，係電視城兜埋佢返屋企，都係將軍澳。」怕唔怕老婆呷醋？佢話：「唔需要（解畫），知我係咩人。」老婆有信心？佢話﹕「係係係。」怕唔怕朱晨麗畀人話係第三者？佢話﹕「梗係唔係。」會唔會保持距離？佢話﹕「唔會，同事，冇嘢冇乜所謂。」而朱晨麗亦透過短訊回覆﹕「哈哈，這個新聞太好笑。」