前兩日想買部新嘅電視機，去到電腦商場兜個圈，眼花撩亂，究竟邊部係電視機，邊部係電腦mon，好亂但又唔敢問，驚俾人笑，係，麻甩佬越大越怕俾人笑，於是上網搵吓料，睇吓有冇人用電視上網同埋用電腦睇電視一樣，結果答你都費事。
硬件我唔識，但係睇波嚟講，就已經慢慢進入咗新時代，以往上網睇波唔係主流，甚至係偷睇為主，直到近年，電視台開始將啲節目擺埋上網，大家亦感受到流動睇波嘅樂趣，好記得第一次喺地鐵車廂入面用now player睇Live，當韋斯咸有球波入咗但越位在先時，我差啲嗌咗出嚟。
睇嚟未來互聯網喺播波嘅身份，將會由配角變成主角，當然要多得變化多端嘅科技發展啦。之前喺台灣，已經見識過《蘋果》網上平台播英超嘅情況（圖），當地家陣冇電視台播英超，《蘋果》每周就揀幾場大波直播，廠可能冇電視台咁大，但一樣有足球BB，一樣有專業評述，一樣有高清畫質，而收費方面仲可以揀，可以畀月費亦可以逐場畀，比傳統電視多咗一份靈活。
國內發展仲誇張，CCTV今年加入戰團，十幾年後又播英超，而與此同時地方台照舊一齊播，而網上平台發展更蓬勃，幾個新媒體龍頭一齊播英超，百花齊放到呢。其實我哋海外球迷係幸福嘅，場場有得睇，反而到今日嘅英國，為咗唔影響入場人數，都仲係奉行周末下午三點冇電視直播！
香港呢？好多朋友流傳緊下屆英超轉播權誰屬，會唔會好似德甲咁分庭抗禮，唔再一家獨大呢？未知，但英國朋友話我知，除咗鬥錢多之外，邊個可以利用互聯網反轉播波框框，畀多啲自主權球迷話事，先至係爭標關鍵。
KEYMAN
節目主持
電郵：[email protected]