碟舖老闆昌哥WhatsApp嚟，話楊千嬅隻《Let's Begin》演唱會BD已到。昌哥知道龍叔叔第二日要出差，都不忘提醒有碟返，全因呢隻演唱會有太多寫佢嘅理由。結咗婚生埋仔，仲話自己唔夠靚嘅楊千嬅，今年居然紅到好似佢把頭髮咁發晒紫，催淚彈《五個小孩的校長》港澳票房衝破4,500萬，仲有《Let's Begin》世界巡迴演唱會，尾場第一行門票居然炒到兩張$6,800，香港人係咪咁恨睇演唱會呀？龍叔叔其實一向對千嬅冇乜喜好，佢咁多齣戲通常都係睇碟多，好少話買飛入戲院，就算睇爆紅嘅《新紮師妹》都唔多識笑，最有印象嘅gag位都係教人方中Sir個「Sir」字中文係點寫。不過自從識咗「超級千嬅躉」龍嬸嬸之後，開始半被迫咁不停聽佢啲歌，又不停接收丁生丁太有幾幸福嘅news，當然幾個月前仲要撲《Let's Begin》嘅第一行門票啦。未開show，日日睇住啲飛暗盤價係咁升，由二千炒到四千，最離譜係尾場已經有人叫價近七千蚊兩張飛。咁受歡迎，全因第一場開show後口碑極好，加上每日唔同嘅嘉賓粒粒都勁，Sammi、Joey、Eason同學友都嚟撐場，都幾難唔炒起。
樂壇人瑞 唔怕被唱年紀大
龍叔叔第一次睇千嬅演唱會，論製作同唱功，都覺得稍稍不及鄭秀文同容祖兒，不過當晚令龍叔叔完全改觀嘅，係千嬅既親切又坦率。N年前已被高登仔戲稱「樂壇人瑞」，千嬅居然唔介意，仲喺演唱會大大聲話自己「四十有一」，宿敵容祖兒做嘉賓果場，仲話乜敵對關係乃marketing營造出嚟等等。香港已經好少有知名度嘅藝人咁真情流露喇，龍叔叔開始喜歡上呢位儍大姐。
當然，千嬅唱功本身都好好，而且有唔少令人一再回味嘅靚歌，睇番隻碟，又再勾起當晚《小城大事》、《笑中有淚》、《最好的債》、《好不容易遇見愛》嘅感動位，出名喊包嘅千嬅，喺尾場都算忍得住眼淚，坐喺隔籬陪睇嘅龍嬸嬸，反而喊到收唔到掣。
嘉賓多 可惜cut晒對話
藍光碟最好睇嘅，係碟尾收錄晒每場唔同嘉賓嘅內容，同Joey唱《習慣失戀》、跟Sammi唱《終身美麗》又係好聽到暈，尾場仲有丁子高突襲，匿喺後面扮dancer，感覺好溫馨，換轉係第二個，你好難想像到劉浩龍或許志安會咁sweet囉。要鬧嘅係嘉賓雖多，衰在cut走大部份傾偈內容，搞到個個都好似匆匆上台唱首歌就走咁。
雖然製作上唔算有乜驚天動地大場面，不過藍光碟聲畫質素算係不俗，大光大暗位都算有番details，激光衫、煙幕營造嘅效果都好出好清晰，DTS-HD MA嘅包圍感好好，觀眾吶喊聲圍住自己，好有現場氣氛。睇埋幕後花絮，千嬅同工作人員講講吓笑話，都可以喊到收唔到聲，發覺佢真係幾可愛。Bonus主要係圍繞千嬅點努力keep fit，同埋排舞時點樣死記舞步等，同樣四十出頭嘅龍叔叔就淨係識匿喺屋企煲碟同趕稿，都幾慚愧。
三粒鐘嘅演唱會令龍叔叔回味無窮，卒之忍唔住loop多一次，煲足六粒鐘先開始寫稿，呢兩嚿水相當抵睇。
編輯：陳漢榮
美術：楊永昌
龍叔叔
幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。
