8月19日星期三下午到咗鹿兒島嘅城山觀光酒店（Shiroyama Kanko Hotel），此酒店位於山腰之上，佔地甚廣，有一架巴士行走酒店與市區之間，上到房間打開窗門一望，櫻島火山就在對面海，肉眼觀之，就像太平山老襯亭望過去獅子山咁樣嘅距離，有新聞話櫻島火山會爆，但我地睇過去就不見異象，風景好靚㖭，望落山就成個市區在眼前，但建築物甚為普通，並無美觀之處，睇火山仲好。
此酒店夠大，有氣派，建成於60年代，以80年代地價計，應值天價，今天大概已經跌咗唔少。老酒店有老酒店好，服務優良，山區寧靜，還有一個小山坡，有小瀑布（四五層樓高）直奔而下，在「和食」餐廳外街落池水，配上高聳樹木，有郊外禪院之美，在此吃和牛與黑豚Shabu-Shabu，那管得手機不斷傳來之曼谷追捕炸彈爆炸兇徒之新聞。
離開餐廳不遠，有一間麵包房，標誌home made麵包，山上酒店有間咁大嘅麵包舖，比較奇怪，邊個嚟買麵包呀？肥仔K去打聽吓，方知此乃鹿兒島數一數二之麵包店，有市民不惜搭巴士上山，特登到酒店買麵包，更多來此參加宴會之賓客，乘機買麵包回家食用。講得咁巴閉，我地雖然食和牛火鍋食到飽飽（六千幾Yen一客，約四百幾港紙，抵到爛），但仍然買麵包試食，太太果然連聲叫好，只可惜唔可以買麵包帶返香港啫！食完飯例牌去浸溫泉，之後上床，睇到太陽東升，陽光穿窗刺眼，先至起身，呢啲無鬧鐘嘅生活，叫做自然醒，一年難得有幾次㗎。
早餐過後，執好行李去鹿兒島火車站，搵Locker鎖起行李，再出去逛街，車站對面有「一番街」，頗似大阪心齋橋，只是大阪人流暢旺，呢條一番街搵多個人都冇，檔主真係希望有強國遊客打救。咁少人，打個白鴿轉就走，去咗一條新啲嘅天文館街，人多啲嘞，但冇乜氣氛，於是返回火車站，嘩，呢度係現代化商場，人頭湧湧，食拉麵要排隊，可見商場文化徹底打倒傳統街道店舖，鹿兒島市民已捨一番街而就火車站新型商場，用香港流行術語講，就係地鐵地產霸權贏晒，街頭街尾店舖早已衰落，只係掙扎求存，苟延殘喘而已，市場形勢如此，反資本主義分子高聲抗議亦冇用。