還有倒數26日，港視便播完所有自家製的劇集及資訊節目，而播映中的《Night Shift》下周三便大結局，飾演大Sir的郭鋒在劇中享盡溫柔鄉，與黑警情人菁瑋上演一幕激情戲，菁瑋除剩Bra大騷33C上圍，並主動出擊攬住郭鋒條頸，然後送上香吻，郭鋒嘟嘴迎合。不過，63歲的郭鋒表現有點生硬，昨日在電話中自爆被導演要求多拍幾take，他苦笑謂：「睇過係有啲生硬，當時冇人哋咁自然，又要拍多次，咁梗係有要求嘅，做就做到，但要做好啲。」
結局變成番外篇
早前郭鋒在《惡毒老人同盟》已與少妻有床戲，今次還來一個熱吻，郭鋒直言唔恨拍：「黐線！好恨咩？係側邊啲工作人員恨，我都唔知幾辛苦，尤其呢啲福利，冇好過有啦。」他強調拍攝時沒尷尬，問有沒有向老婆歐陽珮珊備案？他說：「要講㗎咩？我冷感，後生女又點，咪又係人一個。我同佢（菁瑋）好熟，係波友，一齊打羽毛球，所以冇尷尬。」對於港視快「玩完」，郭鋒感觸良多謂：「無奈㗎，但老土嗰句『人在做，天在看』囉，受害唔止係我哋。」
受發牌風波影響，《Night Shift》由原本15集減至11集，最後五分鐘結局劇情變成「番外篇」，林文龍等衝鋒隊隊員在酒吧遇上大批喪屍殺人，令結局留下伏線，可惜老闆王維基已宣佈不再拍劇，令season2胎死腹中。
採訪：嵐山
