「星女郎」終於出爐，一個係20歲、身高1米77嘅泰國高妹Tawan（圖），一個係港瑞混血兒Helena。前排曼谷發生炸彈案，Tawan家人雖然唔係住曼谷，但佢都好sad，下個月仲會返泰國探親，而Helena就貼星如喺頭兩回合就可以贏出。
花絮：伍家謙重出江湖
伍家謙（圖右）舊年12月離開大台，一年未夠又做返老本行。噚日佢喺過磅儀式採訪老友Rex，仲透露原來已經辭咗香港設計中心嘅公關一職，全身投入網台HKOnlineTV嘅體育記者工作，今晚仲會喺「冠軍之夜2」作為復出第一擊。
花絮：潮tee「剔」畀VIP
Rex成名以嚟身價暴漲，今年更加接拍唔少廣告，有名錶、有電話等，同佢合作開嘅「一剔」運動品牌今次就特製一批黑色潮tee（圖），印上「#YOURLIMITISYOU」，派畀賽事VIP。至於會着咩衫出場，Rex話要等今日畀大家一個驚喜喎！
