投身護理界39年的社民連副秘書長麥國風，噚日喺尖沙嘴設宴22席宣佈榮休，唔少醫學界名人都畀面出席，包括食衞局局長高永文、醫管局行政總裁梁柏賢、醫學會會長史泰祖、精神科專科醫生曾繁光、港大校委會主席梁智鴻，都現身飯局，畀足面撐場。
麥國風同嘉賓上台大唱「友誼之歌」之餘，高永文亦分享同麥國風往事，指當年沙士爆發時，麥國風曾邀請佢到病房探訪沙士病人，梁智鴻就讚麥國風喺宣傳控煙同防止愛滋病的工作出色。
八方聽聞，上屆以些微票數，喺灣仔樂活選區輸畀「白姐姐」白韻琹嘅麥國風，嚟緊好可能出山再戰。
由於2007年參加香港島立法會補選時，曾以跳「飯碗舞」出位的蕭思江，早前已表明會參選樂活選區，相信嚟緊11月區議會選舉會有好戲上演。