龍虎武師出身、現年69歲的資深藝人李家鼎（鼎爺）效力無綫40年，最近忽然成為焦點。早前鼎爺以合約藝人身份痛斥無綫製作馬虎，新人又只顧玩手機等，但鼎爺否認鬧公司，謂只是批評一些演員不長進。日前再有報道指鼎爺經常趁新劇開鏡拜神拿走拜神雞、燒肉和生果，未知是否攞意頭？有時拍完劇，道具雀籠更無故失蹤。
性格火爆的鼎爺立時起火，前日在公園自拍短片解話，由細仔李泳豪放上facebook。鼎爺起初不慍不火，感激圈內朋友力撐，並抱拳致謝。接着鼎爺緊皺眉頭謂：「我想講一句，岳飛俾秦檜害的時候，三個字：莫須有。估唔到咁多年，到今時今日，呢三個字竟然用喺我李家鼎身上，話我專……撻……拜……神……雞。我想請問聲，幾十個記者幾十位演員又有監製咁多人喺度，我點樣撻嘢？我只係攞嚿燒肉食，有時多咗嘅我攞多嚿，咁就叫撻？分分鐘有時演員都未必食到一嚿，因為你知一隻豬，兩隻雞有幾多嘢㗎啦，係咪先？你話我撻嘢，咁係咪即係莫須有呢三個字呢？」
家中雀籠最平七、八千
鼎爺提起雀籠就越講越火，聲如洪鐘說：「我玩雀就全世界都知，我啲雀籠唔一萬（蚊）過外都七、八千，仲有褸住雀籠塊布，都係我請專人度尺寸做，全個玩雀嘅人都知道。道具雀籠唔放過？我想問一句，公司所有道具都有編號，我點可以攞出嚟呢？」鼎爺並語重心長謂：「上天下地中間良心，我冇做過對人唔住嘅事。」記者昨日致電鼎爺，他謂不便接受訪問，未有再回應。
採訪：嵐山