港足噚日一早去清遠集訓四日，備戰下禮拜四嘅世界盃外圍賽作客國足，教練金判坤話嚟緊兩場鬥同組最強嘅中國同卡塔爾，如果和到兩場都收貨喎。
噚日北上嘅港足，幾位東方嘅代表好似葉鴻輝、聶凌峰同徐德帥，以及喺國內踢波嘅白鶴，下午自己到三水同大隊會合。金帥開操前同球員訓話，但係飛馬同傑志嘅代表，因為前日踢完波，呢課只喺場邊做恢復訓練。
金帥話星期日友賽東方，會係鬥國足前唯一嘅練習賽，所以希望東方派晒所有外援落場，強攻港隊，等球隊收到練兵之效。金帥仲話啱啱踢完亞協盃八強嘅南華同傑志球員狀態好，相信有助球隊鬥中國同卡塔爾做好防守。白鶴雖然喺早前比賽撞傷眼角，但應該無礙落場，佢早前喺中超遇過北京國安嘅于大寶，覺得呢位國足前鋒有料到，所以會叫隊友小心防守佢。
去過金鐘 球迷失中港波飛
至於買咗飛嘅香港球迷開始陸續收到飛，不過唔係搞晒手續兼確認埋就等於有飛，噚日有球迷就收到消息，話佢過唔到審批而唔獲派票；港足球迷「香港力量」嘅成員佐敦，之前搵阿哥跟足程序完成買飛手續，點知佢阿哥噚日通知佢，話佢因為審核唔通過冇飛，令佢非常無奈︰「雖然我都聽過傳聞要審批先買到飛，唔批會獲退款，但問題係審批又有咩準則呢？同一個交易買五張飛，係得我同另一個朋友買唔到。上年係有去金鐘（佔中），但我過往北上睇省港盃、中超都冇問題，唔明今次點解又唔批？」佢話既然強國要整「防火牆」唔畀佢返去，都唔會勉強「翻牆」，大不了以後唔過深圳河，留喺屋企睇直播算數！
