近來日本威士忌俾人熱炒，唔只香港好難買到，八方去到日本北海道嘅余市蒸餾所，一樣發現余市、竹鶴呢類熱炒威士忌俾人掃清，不過呢啲日本威士忌就算熱炒，始終唔及已經停產嘅羽生蒸餾所、輕井澤呢類神級日本威士忌嘅天價，噚日就有個威士忌拍賣會入面，呢兩個牌子威士忌創出史上最高拍賣成交價。
香港邦瀚斯噚晚舉行「威士忌拍賣會」，其中羽生蒸餾所54瓶「撲克牌全系列」威士忌，以超過379萬天價成交，創拍賣史上最高價日本威士忌系列價格，另一枝輕井澤1960—52year old單枝威士忌，就以超過91萬蚊成交，亦係拍賣史上最高價單支日本威士忌成交價，拍賣行話呢兩個項目都係由來自東南亞嘅買家投得。