中國迎戰香港嘅世界盃外圍賽大戰下星期四先開打，內地傳媒就喺大戰前夕先爆單猛料！據內地體育傳媒《體壇周報》報道，有「中國拉莫斯」之稱，效力廣州恒大兼國足主力嘅後衞張琳芃，已經被英超班霸車路士睇中，將會喺夏季轉會窗完結前以1,000萬歐元買入呢位中國球星，令佢成為孫繼海同鄭智等後再投身英超嘅中國球星！
親證獲車仔賞識
《體壇周報》報道，指車仔已經留意咗張琳芃一段時間，包括摩連奴在內嘅教練組同技術人員，一致認為佢有能力喺球隊立足，可以成為伊雲洛域嘅後補。喺收購張琳芃嘅決策過程裏面，教練組、技術組甚至連女CEO加諾詩雅都參與其中，而且係官方式報價，毫無商業因素考慮喎！張琳芃本人就話好開心自己努力咗咁多年，終於有英超球會賞識，可以實現佢出外踢波嘅夢想。講到似層層咁，唔通呢單料係堅嘅？
不過，我求大俠都係勸張琳芃唔好開心得咁早住。雖知道中國球員轉投外國大球會都係失敗例子居多，遠有當年效力曼聯嘅董方卓、近年有剛剛被禾夫斯堡遣返嘅張稀哲。董方卓當年喺曼聯淨係出過三次場，離開咗曼聯之後𠵱家連中超都踢唔到；而喺上年尾加盟禾夫斯堡嘅張稀哲，一場德甲都冇踢過就回歸北京國安，有網民甚至話佢似汽車銷售員多過似足球員，真係令人心酸。
張琳芃嘅能力一早得到名帥，好似納比同簡拿華路嘅認可，絕對有能力出外搵食，不過一下子就轉投英超班霸又好似爭啲喎！而且因為唔合資格申請工作證，預料佢會被外借出去。睇見車仔外借球員多到可以註冊一隊英超球隊，佢哋爭取重返球會嘅競爭都咪話唔激烈！不如學吓日本球員武滕嘉紀，拒絕車仔加盟德甲嘅緬恩斯，腳踏實地咁爭取出場機會仲實際啦！
另一方面，熱刺啱啱官方宣佈從利華古遜簽入南韓翼鋒孫興民，估計轉會費高達2,190萬鎊，令佢成為亞洲最高身價球員。呢幾年好多亞洲球員身價急升，睇嚟佢哋喺國際球壇真係越嚟越馨香喇！