左丁山與肥仔K等一齊去日本九州，旅行一星期，幾愉快。本來左丁山係想去泰國嘅，但適逢肥仔K已經去咗東京一個星期，趁老婆學校暑假未完，還有一個星期空閒，肯去埋九州做盲公竹；咁就方便啦，到日本有識日文人士做嚮導，食住行都更方邊。8月15日星期六晚上去到福岡（港龍直航誤點三小時），星期日遊福岡海濱沙灘曬太陽，到咗星期一（8月17日）就買咗三天JR Rail Pass，作價一萬五千日圓，以為唔便宜，誰知三天任坐，計番條數，抵到爛，此則要多謝東瀛遊董事禤國全在報紙俾貼士咯。星期一中午乘子彈火車去到鹿兒島，剛錯過一班特急「指宿觀光車」，唯有坐下一班普通火車去指宿，要七十五分鐘至到，火車沿途起伏震盪，坐得幾辛苦，卒之下午四時到咗指宿火車站，乘的士唔駛十分鐘就到咗肥仔K上日本網預訂嘅「白水館」。嘩，此酒店位於海邊，有特大花園，庭苑，種滿羅漢松及棕櫚樹，寧靜異常，令遠道而來之遊客，忘盡疲勞，成身舒服晒，大樹下之停車場已經滿座，旅遊巴士排隊而至，見到就擔心遊客太多會好吵鬧，點知行落旅遊巴之客人，全部講日語，坐滿大堂，仍然唔覺有甚麼嘈吵雜音，日本人真係有禮貌。
酒店房間包晚餐早餐，我地一行人坐在私家房內吃魚生之際，手機傳來不少短訊，全部係問左丁山是否人在曼谷，曼谷四面佛發生炸彈大爆炸，死傷多人喎！唉，收此等訊息，食都唔安樂，其實左丁山係有五成機會於8月17日晚上七至八時之際，就在四面佛附近嘅，歷年在此地點不知留下多少腳毛，今年三月先至去過，住在四季酒店（現已改名），離四面佛不過三分鐘腳程，又曾住在爆炸現場樓上之洲際酒店，回想起來都幾牙煙，幸好呢次有意外發生之時，人在和平寧靜之地，指宿白水館，或者係有運啦。飯後睡前去浸溫泉，十分舒服，白水館有四個「風呂浴場」，可露天看夜景，其中一個係熱沙「浴場」，肥仔K全部試勻，話感覺非常良好，此酒店雖無沙灘，但有臨海大泳池，適合兒童玩樂，確是一家大細之優閒好地方，值得推薦。次早吃個早餐，計啱時間坐穿梭巴士到火車站，坐上特快火車返鹿兒島，50分鐘就到而且好舒適，比普通火車舒服得多，車費自然貴啲，但已包括在Rail Pass之內，唔坐就笨。返到鹿兒島入住城山觀光酒店，又有驚喜。