康文署唔公開招標就將尖東海濱活化及管理權批畀新世界，受到法律挑戰，保護維港行動成員莊榮輝同長洲居民郭卓堅噚日入稟高等法院，提出司法覆核，質疑計劃將公眾利益輸送給發展商，要求推翻康文署決定。
質疑益梁粉鄭家純
協助兩人嘅民主黨何俊仁指，計劃不符公眾合理期望，而新世界主席鄭家純同特首梁振英關係密切，支持過梁振英參選，計劃單方面批畀新世界，令公眾質疑係私相授受。民主黨李永達就同八方講，康文署話計劃屬非牟利，所以唔使招標，不過社署好多長者及青少年服務，都屬非牟利機構承辦，一樣要公開招標，點解呢個項目例外？
康文署話密切留意事態發展，暫不作評論，強調活化尖沙嘴海濱是以夥伴合作模式進行的計劃，以公開、公正及合乎公眾利益的原則下進行規劃。