劉青雲年初在金像獎的「太空論」，技驚四座感動太太郭藹明，亦令粗獷的他跟「情聖」二字沾上邊，他拍過的愛情電影寥寥可數，難得新戲《三城記》跟愛情片天后湯唯合作。雖然嫁作韓籍導演金泰勇為妻，但湯唯對愛情仍憧憬，獨愛童話故事。對於導演路青雲表示不敢試的原因是「萬一我成功咗冇人搵我拍戲點算」。撰文：何永寧
劉青雲跟湯唯早前為主演的電影《三城記》接受本報訪問，電影以抗戰時代為背景，講述戰亂中兩人奔走三地的戀情。藉「情」打開話題，湯唯入行以來的電影都離不開這個字，《色，戒》、《北京遇上西雅圖》等如是，她笑言只有近作《捉妖記》例外：「女人淨係講愛，所以導演搵親我都係愛情片。」相反青雲對談情說愛較陌生，他笑說：「記憶中對上一部愛情片係同張栢芝演嘅《忘不了》（2003年），要我揀鍾意拍《竊聽》定愛情片，咁要睇吓邊個導演啦。其實拍愛情片有難度，因為好睇男女主角拍埋順唔順眼同夾唔夾，《新不了情》到𠵱家都講緊，就係因為袁詠儀加劉青雲啲人受落。同埋愛情片好複雜，唔係兩個演員演得真就可以打動人，愛情片其實係幾奇妙嘅事。喺現實裏面，我應該係愛人多啲嗰個。」此話一出，不期然令人想起青雲年初在金像獎向太太郭藹明發表的「太空論」，冧盡台下不少女性觀眾。
付出感覺更幸福
而身邊的湯唯同樣喜歡付出，她說：「需要我多啲咪多啲，少啲咪少啲，不過鍾意付出多，感覺會幸福啲。」踏實的湯唯，對童話故事有莫名的偏好，喜歡經典愛情電影《人魚公主》，她說：「嗰套《人魚公主》係俄羅斯1976年拍嘅真人版，屋企有一套小學時儲落嘅《世界童話名著》，一共有八冊。」
對於不少演員都想演而優則導，視導演一職為終極目標。不過青雲就曾被「告誡」這是條不歸路，他笑說：「如果我諗到想拍乜嘢我會做，如果我有一樣嘢想話畀大家聽，我會做一次。不過我唔會強迫自己去做導演，萬一我成功咗點算，你有冇諗過後果先？導演爾冬陞就同我講過一件事，佢話『如果你執導一部戲成功咗，咁以後就冇人搵你拍戲』。」而在內地中央戲劇學院導演系畢業的湯唯，雖然紅褲子出身，但一直都未有的起心肝學以致用，她說：「以前同戲劇學院老師見面，佢都叫我做導演，每次同我講『湯唯，你不要忘記你是導演系畢業的』，我都係答佢『冇興趣呀』。直到佢最近走咗，我開始諗係咪真係應該諗吓（做導演）呢？或者30年、50年內做一次。」
拍戲最怕「嚟多個」
談到不同地區導演的風格，先後和台灣、香港、美國和韓國的導演合作過的湯唯說：「都係性格同語言唔同，外國人咪用英文，中國人咪用中文，主要喺脾氣唔同。」已嫁韓國導演金泰勇為妻的湯唯，評到自己丈夫時她甜笑說：「佢唯一唔同係做導演之前係讀政治外交，其他冇唔同。」湯唯回想入行初期，曾經有一段跟導演的經歷令自己很難忘，雖然她沒有指名道姓，但不難聯想就是拍導演李安的《色，戒》時發生，她說：「嗰一次拍有好多人，大概幾百人喺度喊，但我喊唔到，搞到幾百人喺度等。導演喺度發自己脾氣，雖然佢冇鬧我但我好難受、好自責，如果我喊到佢就唔會發脾氣，最後我都喊到出嚟。」
而青雲自言不怕導演發脾氣，只怕他們說一句話：「最驚導演喺片場話『嚟多個』，跟住拍完之後又嚟多個，咁即係點。嚟多個即係有問題啦，但又唔會畀時間你諗就已經要再拍。」而湯唯對「嚟多個」有不同見解，她說：「成日都覺得自己做得唔夠好，可以嚟多個又唔使我錢梗係好啦。不過最驚都係啲導演話『好、perfect、完美嚟多個』，嗰啲係最多。」
場地：香港東隅酒店
