張婉婷導演的電影《三城記》緣起於香港老一代逃難的事迹，一向鍾情移民故事的她，早年就有譽為移民三部曲的《非法移民》、《秋天的童話》及《八両金》問世。張婉婷笑言原本想拍自己父母：「佢哋以前成日講起走難嘅古仔，都好曲折動人，不過冇心機聽。到我想聽番嘅時候，佢哋已經唔係度，所以搵咗人哋嘅古仔嚟拍，不過戲裏面秦海璐飾演嘅仇肖玲仇大姐，就真係媽咪個名。」她表示當年父母的愛情故事亦頗堪回味，家族亦曾經由擁有幾條街到住板間房。
談到當年入行，張婉婷透露一定要多謝方逸華及張堅庭，她說：「美國讀電影，畢業要拍套作品，同班同學唔係油王個仔，就係某位巨星嘅細佬。係得自己要靠自己，咁啱有幸認識嚟學校參觀嘅方逸華小姐，之後就膽粗粗拎咗個劇本返香港去邵氏畀佢睇。」但過程波折，她直到臨離開香港返美當日仍未見到方逸華，最後全靠張堅庭出手相助：「喺邵氏見到阿庭，大家都喺美國讀電影，佢嗰時幫邵氏拍完套《表錯七日情》，可以直達『天庭』。最後佢帶我哋直接去見方小姐，方小姐好爽快話冇問題，唔使兩日已經過咗100萬入我戶口，卒之拍成《非法移民》。」