世道複雜，越顯淺的道理越難向孩子言明，包括可愛寵物背後的繁殖慘事。傳道手法時惹爭議的非牟利獸醫協會主席麥志豪，早前在教育工作坊中讓小學生試坐寵物籠，掀起網絡激辯，有家長認為手法侮辱，有父母舉手支持，麥指事後多家學校和團體聯絡合作，還打算推出升級體驗，包括拖繩、集體鐵籠等，向身嬌肉貴的港孩，揭開寵物買賣真相。
為令孩子體會私人繁殖場內動物苦況，麥月中與社區中心合作，為30名高小學生辦工作坊，社區中心主任與義工合作以紙皮製作3個大、中、小的模擬動物籠，近半小朋友主動試坐，有人更模仿小狗爬入籠內，「同佢哋講唔准嘈，因為平時啲動物都唔准吠，會割聲帶，初初一兩分鐘都冇乜嘢，去到3分鐘佢哋開始覺得悶，我叫佢哋坐多陣，坐多一兩分鐘啦，5分鐘又唔係真係好長」。
上載相片後以為怪獸家長會群起攻之，結果反應出奇地好，有學校和團體聯絡他合作，「小五小六嘅小朋友會話『好慘喎』、『好殘忍』、『動物坐咁耐會好辛苦』，我問佢哋會唔會覺得買賣動物好慘，成世就係咁㗎喇喎，個個都話梗係唔會」。麥志豪坦言，事前沒諮詢家長，但一直步步為營，「我哋都好顧image，所以堅持用紙皮箱整，而唔用真正狗籠」。
計劃升級模擬拖繩做特技
他擬推出「升級版」，包括拖繩、模擬大型繁殖場等和特技表演，強調不會太有傷害性，「等佢哋明白狗做特技、海豚表演，都係為咗討好人，令人開心」。
麥志豪指工作坊的目的，除了是教育下一代，也挑戰成年人的固有觀念，包括動物和人的地位平等，反對警犬、導盲犬，任何利用動物服務人的舉措。
麥志豪直言最大願望是全港所有寵物店執笠，「全部人都覺得賣動物係羞恥，你鍾意，但都唔可以咁自私」。他指在德國、澳洲等地，絕大部份動物是領養而來，「有啲人覺得咁係激進，好似以前解放黑奴，之後解放婦女，我哋只係解放動物咁解」。
■記者張嘉雯
