即將退休嘅《城市論壇》主持謝志峰，噚日接受劉慧卿網台訪問時，大爆三個中西環高層對《城壇》巧京京，邀請佢哋出席卻全數唔應承，原因不外乎係《城壇》太熱「鬧」嘞，相信佢哋覺得，此地不宜佢哋久留。
邊三個高官，請謝志峰食檸檬？當然包括特首梁振英，謝志峰話CY剛上任特首時，因為佢經常代表港台喺政總開會，曾經喺政總親自邀請CY出席《城壇》，引述CY親口拒絕，原因係：「我唔係唔想，但去到會好多人圍我，一圍就好惡搞。」
林鄭：唔好嘞啩
至於「好打得」嘅政務司司長林鄭月娥，峰哥話喺天星碼頭事件時，林鄭的確好勇，現身移師碼頭舉行嘅《城壇》，並喺《城壇》5年前嘅30周年紀念活動上，自稱「經常」出席《城壇》，但事實係，林鄭上任政務司司長後，一次都冇再蒲頭，曾經回覆：「《城市論壇》？唔好嘞啩！」
連出名「惹火」嘅中聯辦宣傳文體部前部長郝鐵川，峰哥都試過邀請，佢引述郝鐵川話：「哈哈哈，小謝，你是把我放在熱鍋裏吧！」結果都係食咗檸檬。
坊間盛傳政府內部曾經討論，政治委任官員係咪不宜上《城壇》？峰哥覺得呢個傳聞不攻自破，因為勞工及福利局局長張建宗、民政事務局副局長許曉暉以及政制及內地事務局前局長林瑞麟，都曾現身面對群眾。
李八方
mailto:[email protected]