昨日是農曆七月十四日鬼節，一向百無禁忌的黃夏蕙以一身魚網背心及熱褲造型，出席在海洋公園舉行的哈囉喂15周年活動，現場又播出夏蕙姨與海洋公園前主席盛智文合演的Halloween宣傳片，當中二人合演一對紋身情侶，盛智文要幫夏蕙姨紋身，而夏蕙姨則要瞓在真的殮房停屍間。
夏蕙姨一向貪靚，昨日記者讚打扮得靚時，她就指自己在片中的造型很醜，她笑說：「個造型好醜呀！醜樣到自己都覺得驚！」問她要真的瞓在殮房放屍體的箱內怕不怕？夏蕙姨表示：「唔驚，棺材都瞓過喇，不過有種魂不附體嘅感覺。」
怕嚇親細路
夏蕙姨續謂：「我棺材都瞓過啦！不過喺片場要瞓落真嘅殮房箱入面，仲要關埋門同熄晒燈，周圍又黑晒咁，就有啲鬼影幢幢嘅感覺，但就冇真係見到（鬼），反而以前就真係試過撞鬼。」
問夏蕙姨今年的哈囉喂會否應節，扮鬼扮馬到蘭桂坊湊熱鬧？她即笑說：「我怕嚇親啲細路，所以唔會去喇！」至於，昨日出席活動及今次瞓身拍片的酬勞，夏蕙姨坦言感到很滿意。她說：「今次嘅酬勞有六位數字，所以都好滿意。」她又謂，除了本身酬勞，導演及公司知道她要瞓停屍間，都有給她利是。
採訪：王連連
攝影：沈健程
