「老虎仔」邱達昌一向直腸直肚，噚日佢炮轟香港地產行家，話市場上唔少樓盤都係「扮豪宅」，一旦樓市有風險，呢類樓嘅樓價就好可能大跌，「全世界都冇見過！冇可能下面賣緊1萬蚊呎，上高（複式單位）可以賣3萬蚊呎喎，同一幢大廈……過億嘅Penthouse跌到5,000萬至6,000萬，我唔會覺得好奇！」
不過又咁講，老虎仔鬧緊行家將普通樓「扮豪宅」賣嘅同時，其實又知唔知好多市民都鬧緊發展商𠵱家推出嘅新盤，單位面積越來越細，設計更加三尖八角，勁有劏房feel呢？老虎仔旗下遠展（035）就快開賣嘅黃大仙新盤鑽嶺，都有款不足200方呎嘅單位。
老虎仔就好似好無奈咁話，指「樓價升得太快，𠵱家地產商點應付？好唔好意思，只能令啲單位越整越細，越細嘅單位越多人買。」講完。