工黨何秀蘭何EE早排因為做小手術時出現藥物敏感，搞到全身起晒水泡，最終留院23日後，前日出院復工，噚日更上載同卿姐嘅合照。何EE話病情嚴重時，全身有多達十幾平方吋水泡，每隻腳嘅水泡多到可以裝到一杯水，都咪話唔恐怖。最終喺皮膚科醫生余浩德悉心照顧下，已經好番九成九，身上只剩番少少水泡，可以自己處理。根據醫生建議，何EE為防細菌感染同甩皮，現時每日都要搽好多cream，最慘係唔曬得太陽、亦唔游得水，呢輪出街時都要撐傘。何EE又特別多謝卿姐、工黨兄弟同埋舊同事，喺佢病時頻頻探望，不時買外賣畀佢。