下月底nowTV旗下收費嘅101同102台就關閉，全部本來有節目做緊嘅主持通通冇得留低，原名梁奕倫嘅梁梓禧（Roland）、茜利妹主持嘅《攣直後援會2》當然難逃劫數，兩位主持就喺最後一集請咗王賢誌（Vinci）同黃宇詩做嘉賓作為結尾。另外，茜利妹就秘密搵咗梁爸爸拍片，內容都係梁爸爸話支持佢嘅性傾向嘅感動嘢。
搞製作公司
噚日馮仁昭打電話問Roland係咪即將失業，原來佢已經有新嘅工作計劃。Roland話：「雖然9月中喺電視工作會暫時失業，但自己嘅製作公司生意會keep住營運，亦都好好彩，我同茜利妹合作製作嘅三個節目，已經搵到贊助商支持，好快就會開拍。」
Roland又話，𠵱家咁嘅市道，唔可以淨係坐喺度等機會，一定要自己爭取，佢仲透露其中一個節目喺9月就會播：「今時今日拍節目有贊助唔容易，好在我哋人緣都算唔錯，節目拍完會賣畀唔同嘅電視台播。」
撰文：馮仁昭